Ev Der Bajarê Kobanê ye

Mahîr Bagok

Ev der baxçeyê Kobanê ye.

Derîzgeha li vir

Sirûş daye dilêran

Şîlanên li vir

Av daye li giyanê çavreşan,

Ev der jiyana hebûnê ye

Kîbela kurdê de

Kotonêya esmer

Xemzeya bêhînkûf e

Ji avzêma berxwedanê diherike bêriya hîmdar

Ev der rihê Kobanê ye

Keleha bê manendi

Xeleka vejînê ye

Ji çirûskên vîna hevgirtî

Ev der erdnîgariya Kobanê ye

Peymana çarenûsê tê honandin

Xewnerojkên xwe,

Dineqişînin li nîgarê Rojhilata Navîn

Nexşeya dahatûya li vir rênîşana rê jinê ye

Ev der ” KOBANGRAD” e

Li vir

Tên strandin sirûdê dozê

Bi hîngorê re

Stêrkên rûgeş peyda dibin li rûmetê

Bi berbangê re

Newaya azadiyê hembêz dikin li Rojê

Ev der bajarê Kobanê ye

Derîzanê jiyanê

Li vir

Derbas dibe dilşadiyê

Ev der bajarê Kurdistanê ye

Deriyê bûneweriyê

Li vir

Dibuhure sterojan

Li vir

Diherike cengê

Deriyê destanê

Li vir

Diçe dîroka şoreşê.

                                      Girtîgeha Tokat Tîpa T